كتابة فى اللاشيئ

صامتا اركض فى المسافات باحثا عن اشعة الشمس قارئا فى فناجين القهوة محاولا العثور على وميض من الاشواق التى تسكننى لفضاءات اوسع لكون لا تعبث به رياح الاستعلاء او رغبات الهيمنة او قهر المستضعفين فى الارض
ألهو بأوراقى أمزقها أحيانا أعيد بناءها فى أحيان أخرى أغيبها خلف الستار أوقظها من نوم عميق ينتابها اميط اللثام عن سكونها وخفوت صوتها لكنى سرعان ما يحاصرنى العسس فأركن الى الدعة أعيد قرءة اوراقى القديمة أرتدى قبعة الصمت غير ان العسس لا يغادرون منطقتى فحتى الصمت عدو لهم
تجرأت على الكتابة فى وجه السلطان
طاردنى العسس الى اخر الحدود قذفوا بى الى سواحل الغياب غير أن حضور العشق فتن مخططهم فأعادنى الشعر الى حضرة من أهوى لأكتب عن الاشواق المؤجلة وعودة الاشراقات المسافرة ولغة البوح المكبوتة
أه لم تكن صرخة مقهور كانت صوتا معذبا فى البرية
الفجر لا يكف عن الرحيل
العصافير تغادر أعشاشها غاضبة على طيورها الصغيرة
الشجر يعاند الاخضرار والعشب يقرر الاستقالة
القمر فى مساءات بلادى يصيبه الضمور
النهر محزون
الليل غابت عنه كواكبه
الرياح تحاصر الوجوه تشرئب الاعناق يتكاثر العسس
فأمضى الى عينيك
مشرعا عشقى سلاحا
لاستعيد رائحة الوطن
هو البداية والخبر
هو الساحر والقاهر والمقهور
هوالوجود المزدهر

مرافئ 8 ابريل

حسبي الله ونعم الوكيل ...

بجد الواحد مش عارف يعمل ايه في اللي بيحصل ده .. الواحد تعب بجد .. ليه بيعملوا فينا كده مش عارفة .. ليه بينتقموا مننا رغم احنا ماعملناش حاجة برده مش عارفة يمكن في تاريخ حصلت فيه مشاجرات وبينتقموا مننا برده مش عارفة بقيت هتجنن .. وفاضل عرق وخلاص هيطق .. من ايه ؟ طبعا من اللي بيعملوه فينا هما مين ؟ دكاترة القسم عندنا بجد نفسي ..... ولا بلاش !
كل دكتور منهم بيعاملنا وكأننا عباقرة وفاهمين كل حاجة في الفلسفة وكل دكتور منهم بيخلينا نذاكر مادته وبس على اساس ان مادته هي اهم مادة واللي يقول في امتحان شفوى ويلعب بأعصابنا واللي جى فاكر دلوقتى انه فيه اعمال سنة جى يقول عليها في آخر السنة واللي بيخلينا ندفع دم قلبنا على الكتب عشان ننجح مالنجاح دلوقتى بقى بفلوس ولا كمان الدكتور اللي كل شوية يقول على اسم مرجع نروح نجيبه مانلحقش نقراه حتى وينزل مرجع تانى طب ده بقى اسمه كلام والله ده كده حراااام .. طب نعمل ايه ؟ نروح لمين ؟ مش هاقدر اقول غير ربنا يهديهم علينا ويرحمونا شوية حسبي الله ونعم الوكيل في اللي بيعملوه فينا .. ربنا يهديهم علينا مش هقول اكتر من كده .........

إستشارات عاطفية ..

تشخيص الإستشارة ....... قصة حب جامعية لاتعرف مصيرها

بســم الله الـرحمــن الرحيــم السلام عليكــم ورحمـة الله وبركاتــة ،،انا فكرت كتير قبل ما اكتب بس بجد الموضوع رائع ربنا يكرمكانا عرفت زميل فى المدرج بالصدفة البحتة فى المترو وعرفت انه معايا فى المدرج وبدا الموضوع نظرات وكنت لسة ف اولى وكان دايما ينظر لى بس كنت بطنش وكنت اظنه بيتسلى وطلعت ثانية ونفس النظام يبصلى ويبتسم وللاسف مش عارفة اقول حبيته ام اعجبت به وكن الغريب انه مؤدب جداااااااااا ولايكلم بنات اظلاقا وانا زيه اصحابى كلهم بنات مش اقادرة اوصفلك كان بيعمل ايه عشان يلفت نظرى على فكرة هو خجول جدااااا ومحترم جدااا لدرجة انه كان بيستنانى فى المترو لان كنا بننزل فى نفس المحطة وكان لايخرج من المدرج الا لم يلاقينى انا واصحابى خرجين وكان يجلس بالقرب منى ف المدرج وطلعت ثالثة ونفس النظام ولكن انا قررت ابطل ابصله او يعنى قلت لازم اغض بصرى لانى بجد حاسة انى اتعلقت بيه قوى ولكن ظلت نظراته تلاحقنى وكنت مصممة على غض البصر ولكنه كان مستمر ف النظر لدرجة ان اصدقاء لى لايعرفوا الموضوع لاحظوا نظراته وقرر ان يغير نفسه وبدا يكلم بنتين وكان يقف معهما وينظر لى واستمر هذا الحال وانا ايضا احاول جاهدة ان لا انظر له لان (من ترك لله شيئا عوضه اللهخيرا منه) اريد ان اعرف هل النظرات لمدة3 سنوات حب ام اعجاب ولكنى انا حاسة انى حبيته وبحاول انساه لان احنا طلعين رابعة وانا دخلت محاسبة ومش عارفه هو دخل ايه ياريت تقولى لى من الكلام القصير ده اذا كان هو بيحبنى ام لا انا لما عرفته كنت لاارى امامى الا هو ونفسى انساه ونفسى ربنا يجعله من نصيبىانتى مش عارفه اد ايه ردك هيريحنى ويفدنى لانى بجد هو بيجى ع بالى كتييير قوى ودى حاجة مضيقانى وجزاك الله خيرا

الرد على الإستشارة ...............

آية الرحمن المرة ده هرد عليكى بجد وبتفاصيل أكتر بصي ياستى الموقف اللي انتى بتمرى بيه ده بنات كتير قوى بيمروا بيه لان احنا في جامعة مختلطة وبيحصل دايما الموقف ده واعرف ناس كتير اتعرضوا ليه انتى عارفة انا حاسة بيكى جدا حاسة انك مخضوضة ومش عارفة تعملي ايه لكن في نفس الوقت عجبتنى طريقة تفكيرك وده أول الطريق انك عايزة تبطلي نظرات او اهتمام بيه حتى لو من بعيد بجد بحييكى على كده وده دليل انك بنت محترمة وبتراعى ربنا في تصرفاتك ومادام طريقة تفكيرك كده يبقى معاكى نص علاج الموقف والباقي طبعا على ربنا اولا واخيرا وعلى أطباء العيادة ممكن رأينا يفيدك ..........................هو طبعا كما يبدو انه هو معجب بيكى واكيد اتمسك بإعجابه ده أكتر لما لقاكى بنت ملتزمة ومحترمة هو مجرد إعجاب بالشخصية بس ماوصلش لدرجة الحب لانه مافيش مابينكم حوار يقدر يولد حب وكده أفضل طبعا .. انتى بتقولى انه محترم وخجول حاجة كويسة جدا بس اللي مش حلو انه لفت الانتباه لكل الموجودين انه هو بيبصلك وده حاجة مش حلوة خالص هو اكيد مش قاصد انه يلفت الانتباه حواليكى هو اندفع في مشاعره جامد جدا ..طبيعى جدا انك تفكرى فيه لانه هو اثار اهتمامك وفضولك لانك اكيد عايزة تعرفى هو ليه اختارك انتى بالذات ضمن كل البنات اللي في الدفعة على الرغم ان مافيش حوار مابينكم .. مافيش حاجة قدامك غير انك تدعى انه لو هو خير ليكى ربنا يقربه ليكى مستقبلا ولا هو شر ليكى يبعده عنك ويرضيكى بشخص آخر بس نصيحتى ليكى انك بجد ماتندفهعيش في مشاعرك قدامه خالص خلى بالك .. ولو في حاجة جواكى من ناحيته نميها بشكل كويس بمعنى انك تدعى وتقولى يارب لو الشخص ده خير ليه قربهولي ............حاجة مهمة جدا لازم تعمليها ناس كتير جربوها ونفعت قوى معاهم إليكى هذه الوصفة ......... بجد حلوة حطى في دماغك الإحتمالين عشان انتى ماتتعبيش بمعنى حطى في دماغك ان ممكن يكون الشخص ده عايش مرحلة مراهقة ومجرد معجب بيكى وبس واول ماتخلص الجامعة خلاص انتهى الموضوع ويفضل ان ده يكون الإحتمال الأقوى أما الإحتمال التانى وده المفروض تحطيه بنسبة بسيطة ان الشخص ده فعلا بيحبك وعايز يرتبط بيكى حطى بس كده في دماغك وماتندفعيش في مشاعرك ليه بقى الوصفة ده موضوع الإحتمالين يعنى عشان لو الموضوع تم وحصل نصيب يبقى انتى هتكونى فرحانة وهتنبسطى وهتحمدى ربنا انه كرمك بالشخص ده لكن لو حصل الإحتمال التانى انه يعنى مايحصلش نصيب يبقى اكيد هتتضايقي شوية وهتزعلى شوية بس هتبقى حافظتى على مشاعرك للشخص اللي هترتبطى بيه بعض كده حافظتى على نفسك ومعلقتيش الشخص برده ده كل الحكاية وصدقينى لو هو من نصيبك أكيد هيكون ليكى لو ربنا أراد وان شاء الله خير ومادام انتى راعيتى ربنا في تصرفاتك يبقلى أكيد ربنا هيكرمك بأحسن حاجة بس انتى ماتعلقيش نفسك قوى عشان نفسك وفيه وصفة تانية بقى ممكن تقرى موضوع قصة الحب الجامعية هتنتهى بإيه ؟ للدكتور أبو أنوس والدكتورة دمعة حزن هيفيدك كتير .......................ياريت مكونش طولت عليكى بس كنت عايزة أقولك رأيى بتفصيل أكبر لانى كان عندى كلام كتير عايزة أقولهولك يارب اكون فعلا قدرت أساعد بحاجة وأتمنى لكى كل الخير والسعادة

تعبانة ..

إذاي أضحك وأنا تعبانة

ولمين أشكى الهم

أنا حيرانة !

لا والله لا ولهانة ولا عشقانة

ده كل الحكاية أنا تعبانة

من إيه ؟

من ناس في قلوبها الشر

من عيون سهتانة

من كره وحقد

وقلوب شمتانة

طب ليه كل ده

ده انا والله زعلانة

ولما واحد يقول الحق

يبقى من الناس الغلطانة

ويقولو نافق اللي حواليك

عشان تعرف تعيش ويانا

لما واحد عايز يمشى صح

يقولوا لأ ده سكة مش خلصانة

إمشى في الاتجاه الصح

عشان تكون في سكة السلامة

ينصحوك .. إقتل ضميرك

عشان الضماير نايمة وهمدانة

يارب طب فين الصح ؟ !

ده أنا والله تعبانة

مصطلحات فلسفية .. الميتافيزيقا

الميتافيزيقا : هو إحدى المباحث الهامة جدا في الفلسفة وتناوله العديد من الفلاسفة في مباحثهم ولعل أهم الفلاسفة الذين تناولوا هذا المجال من الفلسفة .. أرسطو وكانط وقائمة كبيرة من الفلاسفة لاتعد ولاتحصى

ويطلق عليها البعض الفلسفة الأولى وهي عادة تتعلق بالمبحث الإلهى أو مايتعلق بالإلهيات أو الأشياء التى لانستطيع رؤيتها في العالم الذى نعيش فيه وإنما فقط نؤمن بها ونعتقد بوجودها ولكن لانراها

وهذا المصطلح يتكون من مقطعين ..

الميتا .. ويقصد به مابعد أو ماوراء

فيزيقا : وهو العالم الفيزيقى الطبيعى الذى نعيش فيه

اذن الميتافيزيقا هي : ماوراء الطبيعة أو مابعد الطبيعة

ويدور مبحث الميتافيزيقا حول العالم المتخفى العالم المجهول الذى نعرفه ولكن لانراه عالم غير مرئي وغير دارج في تجربتنا الحسية .. ومن عناصر هذا العالم المجهول كما ورد عند بعض الفلاسفة : وجود الله _ النفس _ الروح وأشياء من هذا القبيل

وفي لغتنا العادية غير الفلسفية إذا قلنا هناك عفريت أو العنقاء مثلا وهو طائر مجهول الهوية نحن نعرف ان هناك عفريت او جن او أرواح أو أشياء من هذا القبيل لكن عندما يتساءل أحد منا ما لون العفريت ماشكله ؟ لن يستطيع أحد الإجابة عن مثل تلك الأسئلة لان العفريت لم يقع في تجربتنا الحسية أي لم نراه أو نشاهده وإنما فقط لدينا فكرة عن العفريت والبعض من يؤمن بوجوده والبعض الآخر يقول إن العفريت شئ خرافى لاوجود له

ويطلق أسماء عديدة على الميتافيزيقا والمقابل لها الفيزيقا منها :عالم الغيبيات المقابل له عالم الشهادة ( دلالة دينية للمصطلح )العالم المثالي _ المقابل له _ العالم الواقعى ماوراء الطبيعة _ الطبيعة العقل _ الحس ومصطلحات عديدة تدل على هذا المعنى

والجدير بالذكر ان تقريبا كل الفلاسفة اهتموا بهذا المبحث حتى الفلاسفة الطبيعين الأوائل .. كان لهم بحث في الميتافيزيقا ولكن بشكل غير مباشر حيث انه لم يكن هناك ظهور للمصطلح بعد ويتبين هذا من خلال محور فلسفتهم الطبيعية وهو سؤالهم عن أصل أو أساس هذه الطبيعة .. وبالرغم من اختلاف وجهات نظرهم الا انهم في بحثهم للأصل أو الجوهر للطبيعة يعد في حد ذاته بحثا ميتافيزيقيا وهذا من وجهة نظرى الشخصية ولكنها وجهة نظر صحيحة الى حد كبير لان أحد أستاذتى دعم هذ الرأي .. بل ذكره في إحدى محاضراته

هناك تفصيلات عديدة في مبحث الميتافيزيقا لأن كل فيلسوف له وجهة نظره الخاصة ولا يمكننى حصر كل هذه الآراء .. وماسبق كان عرض شامل وعام في إطار بانوراما عن الميتافيزيقا

ايه هو زمن الفراق وايه هو زمن الصفاء ؟

هتكلم النهاردة عن زمن الفراق وزمن الصفاء بما انهم على طووووووووووول على لسانى .....

ياترى ايه هو زمن الفراق؟

وايه هو زمن الصفاء؟

وايه الفرق مابينهم ؟ واذاي الواحد يقدر يصنع زمن الفراق ؟ واذاي يصنع زمن الصفاء ؟ وامتى يصنع كل واحد فيهم ؟ الموضوع اللي هتكلم فيه ممكن يبقى فضفضة وممكن نتنتاقش فيه ... بس انا بجد بحب اتكلم عن الزمنين دول جدا..
شوية الواحد بيحس انه في زمن الصفاء ويحس بالصفاء من الناس اللي حواليه ويحس إن الدنيا كلها صافية واحيانا تانية يجى زمن الفراق يقضى على زمن الصفاء كده فجأة ومن غير اي مقدمات حاجة تضايق مش كده

عشان كده انا قررت انى ابقى مستعدة لأي زمن فيهم يجى.... لانهم عاملين زي الفصول الأربعة واحد يروح والتانى يجى او بمعنى اصح زي الليل والنهار واحد يروح والتانى يجى وبكده الزمن بيلف مرة بيبقى في صفاء ومرة بيبقى فيه جفاء وفراق ..

زمن الفراق ..

الزمن ده موجود من زمان بس انا مكنتش واخدة بالي منه خدت بالي من الزمن ده من سنتين تقريبا .. الزمن ده قاسي قوووى وكتر خير اللي يستقصده زمن الفراق ياااااااااااااااااااه بيتعب قوووووووى .. لكن ايه هو زمن الفراق ؟

هو الوقت اي وقت بيجى يحصل فراق مابينك ومابين اي حد تعرفه مش شرط في قصص الحب بس لا في الصداقات والتعاملات ياااااااااااااه لمست الزمن ده كتير مالمستوش معايا بس لأ لمسته حصل مع ناس من صحابي وكل ماحد يتخانق مع حد او حد يزعل من حد .. أقول أصل الزمن ده بقى زمن الفراق

والاقي بقى ناس بتقسى على بعض وناس بتكره بعض وناس تلعب ببعض وناس تجنن بعض ليه وليه؟ مش عارفة هيستفيدو ايه؟ برده مش عارفة وارجع واقول اصل الزمن ده زمن الفراق ..

زمن الصفاء

هو ده الزمن الجميل اللي دايما بحلم انه يكون موجود وببقى في أشد مراحل السعادة لما بحس ان في صفاء مابين الناس ومحدش زعلان من حد ولاحد بيكره حد ولا اكون زعلانة من حد ولاأقسى على حد ولاحد يقسى علية

طبعا الزمن ده لما بيمر في حياتى وفي حياة غيرى بيقعد فترة صغيرة وفجأة يتمرد الزمن ويرجع تانى زمن الفراق .. كل مرة كنت بحاول أموت زمن الفراق .. أقتله .. أرميه بأي حاجة وبيمشى ويقوم يلف ويرجع تانى كأنه مستقصدنى أقوم أبعده وارجع زمن الصفاء من تانى وأفضل انا وزمن الفراق على ده الحال هو يجى وانا أمشيه هو يجى وانا أمشيه
بس اكتشفت ان الانسان طاقة وان الزمن ده مستحيييييييييييل يبقى زمن الصفاء على طووول ولا زمن الفراق على طوووول وقلت لما أوزنها صح وأتعامل مع كل واحد زي مابيتعامل ماهو الحياة ده فعل ورد فعل .. زمان كنت بقول لو حد حاول يتعامل معايا بمبدأ زمن الفراق هتعامل أنا معاه بمبدأ زمن الصفاء وكده أحسن ويبقى معاملة الوحش بالحلو لكن اكتشفت انى غلطانة لانه في زمن الفراق ده ماينفعش يبقى فيه صفاء أو بمعنى أصح لقيت اللي بيتعامل انطلاقا من مبدأ زمن الفراق خلاص هتعامل معاه بزمن الفراق واللي بيحب الصفاء وعايز زمن الصفاء هتعامل بكل حب وود وصفاء وارمى أي جفاء ..

أصله ماينفعش الواحد يتعامل بصفاء وصفاء وصفاء ويجى في الآخر الناس تعامله بجفاء ماينفعش ده حتى يبقى حرااااااااااااام عشان كده قلت لازم المرة ده انا اللي أصنع زمن الفراق مع كل اللي يستاهلو زمن الفراق وهما كتير ...عارفين يعنى ايه اصنع زمن الفراق مع دول يعنى اتعامل معاهم بنفس القسوة ونفس الجفاء

وممكن نسمى زمن الفراق تسميات كتير زي : زمن الجفاء زمن القسوة زمن الظلم كل المعانى السيئة

أما زمن الصفاء ممكن نقول عنه زمن الوفاء زمن الصدق زمن الطيبة زمن العدل زمن الود وكل الكلمات والمعانى الرقيقة

وعالرغم انى صنعت زمن الفراق مع ناس فعلا يستاهلو اتعامل معاهم بجفاء الا انى بحن لزمن الصدق والوفا والصفاء..

بس للأسف الزمن ده زمن الفراق ..

لن أطلق لقلبي العنان ..

لن أطلق لقلبي العنان ..

حينما تقهقر صوت العقل ، وفلت قلبي من قبضة يد عقلي ، اندفع قلبي في نبضاته ، وزادت دقاته ، نحو هذا مايسمى الحب .. كان سعيدا القلب لأنه أحس بالإنتعاش ونبض من جديد ، لكنه شعر انه ربما ينهار من طعنة إنكسار من حديد ،فبعد أن كان قلبي منصتا لصوت ونداء العقل بأن يصمد ويظل في مكانه ثابتا لايتحرك ، ويتوقف نبض قلبي ، تألم قلبي من أنه أصبح لايعيش ، قد خمدت نبضاته ، أراد فقط القلب أن يحيا من جديد .. لكن لن أطلق لقلبي العنان ، في المضى في طريق الحب ، لأنه طريق في بدايته نور ، لكن يتقهقر هذا النور ، ويتحول من الوجود إلى اللا وجود ، نعم هذا الطريق المضئ بالأمل ، ينتهى دوما بالألم ، فلماذا اذا أمضى فيه ، هل فقط رغبة في إحياء نبضات القلب ، ولكنه إحياء سيعقبه موت ، موت ربما يكون قاتل .. لذا لن أطلق لقلبي العنان ، وسأعيده إلى قبضة العقل ، وأن يتألم قلبي من وقف النبضات ، أفضل بكثير من إحياء يعقبه موت !

صفاء الشمس